回歸十二年，青少年濫藥愈來愈嚴重，無分時間地點，想索K就索K，而且年齡更有小學化嘅趨勢。有調查發現最細嘅個案只係得七歲咋，要打造一個舉世知名嘅「濫藥港」，易過車大炮！

查實青少年濫藥問題咁嚴重，已經唔係一日半日嘅事。有立法會議員表示，早喺九個月前已向政府提出毒禍嘅嚴重性。據「東方報業民意調查」顯示，有四成六受訪者認為青少年以及校園吸毒情況非常嚴重；兩成九話頗為嚴重；一成九認為嚴重。

弊在曾蔭權到依家至啱啱瞓醒咁，話青少年吸毒問題比想像中大，又要做場大龍鳳搞個禁毒騷，親自督導反青少年吸毒咁話喎。

叮佢個鎯鎯，依家至親自掛帥，遲唔遲啲呀？有三成八受訪者唔滿意佢禁毒態度怠慢，到咗問題氾濫先至正視；兩成九話佢反應遲鈍；兩成認為反映早前成立嘅青少年毒品問題專責小組成效存疑，曾蔭權先至要親自督導。

連曾蔭權自己都承認，今次係「摸着石頭過河」。難怪有三成九受訪者認為，反映當局以往對吸毒問題愛理不理；兩成五話政府對青少年濫藥問題束手無策；一成九質疑佢冇信心改善有關問題。

事實上，當局話就話落實一系列措施禁毒，包括社會動員、社區支援、測檢、康復以及執法等方面打擊青少年吸毒。問題係，除咗講咗好耐嘅校本自願驗毒計劃有些少具體詳情外，其他嘅措施安排都唔知乜頭乜路。

有三成二受訪者認為，最重要係當局盡快實施校本自願驗毒計劃；兩成四批評新措施屬於炒冷飯，冇新意；兩成二直斥措施內容空泛；一成七相信措施只係雷聲大雨點小。

對於政府過去打擊青少年吸毒工作嘅表現，小市民都心中有數。三成七受訪者唔滿意政府嘅禁毒宣傳以及打擊工作講多過做；兩成七認為戒毒服務支援不足；兩成二狠批當局打擊吸毒問題手軟。

鬼咩，政府禁毒宣傳死板兼一味靠嚇，對後生仔已經起唔到作用。有關注青少年組織指出，青少年已經將濫藥當係正常化嘅社交消遣，好似食煙飲酒一樣，可以隨時隨地濫藥。

話時話，依家啲學生要攞到毒品，基本上冇難度，擺到明就係海關同埋警方過分鬆懈啦。四成指摘執法機構把關不力，搞到毒品問題嚴重；三成四批評當局對毒品流入香港市場束手無策；一成一更質疑係當局無心打擊毒品問題。

教育評議會副主席何漢權就講得啱嘞，佢狠批政府根本無用心去做禁毒工作，至今打死都唔公開全港分區嘅濫藥情況資料，預防工作又唔夠具體。叮！真係害人唔使本呀！

叮佢個鎯鎯，濫藥問題嚴重成咁，當局好應該有周詳嘅計劃，點可以一味只係見步行步等運到？搞到完全無王管咁，仲好意思話「救得一個得一個」喎，再係咁落去，「害得一個得一個」就真呀！