新一屆立法會首個立法年度結束，議員無論喺立法會、財務委員會同內務委員會嘅出勤率均被指差強人意。議員Miriam劉健儀、鐵頭仁同劉江華等議員，尋日應邀上《城市論壇》就立法會過去一年表現畀分時，全部變晒濕水炮仗。
主持人問大家，點睇有議員長期做「蛇王」，Miriam只係提醒同僚要為自己嘅言行同表現負責，市民會盯實大家；鐵頭仁就只顧為自己個黨賣膏藥，又話立法會唔係普選產生，喺分組點票制度下，功能組別議員輕易否決民主派嘅議案，言下之意係難怪議員表現唔理想，包括喺議事堂掟蕉、掃枱、講粗口。
劉江華就話好多時喺立法會前廳聽到同僚呻，話喺立法會工作，有浪費青春嘅感覺，意思係指泛民議政，動輒與普選掛鈎，冇普選就乜都冇得傾，佢奉勸泛民放下心結。
班議員平日鬧高官就連珠炮發，但係要彈自己友，唔係點到即止，就係賴呢樣、賴嗰樣，喺度集體玩閃避球。