港交所主席阿Ron夏佳理嘅大女阿Kim下個月拉埋天窗,仲會遠赴印尼舉行婚禮添。但阿Ron話大仔結婚時,因為新抱係菲律賓人,當年喺菲律賓行禮都好合理,但繼女徐文玠○四年結婚,兩公婆明明住喺香港,但最後都決定喺意大利舉行婚禮,令佢大惑不解。
依家連阿Kim都唔喺香港行禮,阿Ron無奈話:「我都唔明啲後生點諗,不過做老竇冇計啦,唯一可以做嘅咪係磅水囉!」雖然佢口講唔明,其實骨子裏不知幾享受為家人飛嚟飛去。
好似今個暑假佢因為工作忙,安排唔到放長假,但依然抽時間去菲律賓探大仔,再趕返港開會,然後又陪老婆返奧地利外家,接住返港做嘢,到八月再去印尼參加大女嘅婚禮。單睇呢個「暑期行程表」,就知佢係廿四孝老公兼好爸爸啦。