舊年入咗富貴黨嘅田北辰近嚟非常好學，前排專登跟舞蹈老師學咗幾堂，上公仔箱跳Cha-cha，雖然跳到好似機械人咁，但為咗慈善籌款，生硬啲都冇計啦！呢排睇怕佢轉咗學做戲。
話說富貴黨尋日開記者會講公布關於毒品禍害嘅調查結果，可能怕齋講數字同建議太悶太硬銷，田二少決定搞搞新意思，等大家冇咁悶。當佢啲黨友介紹禁毒基金申請程序有幾僵化嘅時候，佢即刻反問：「唔係嘛？你喺邊度聽返嚟㗎？」講到正生遷校選址嘅爭議，佢又扮唔知點解正生一定要喺社區辦學，仲問點解唔可以喺大帽山開學校添！
田二少仲將校園吸毒問題比喻為電影《大白鯊》，話戲入面啲人一開始見到大白鯊都唔敢同人講，驚畀人發現會影響旅遊業，提醒大家唔可以對毒禍視而不見，如果唔係就好似大白鯊咁，害死好多人！
呢條唱雙簧橋本來都唔錯，但田二少啲演技仲係幼嫩，未識得收放自如，應該係話過晒火位，十足十Eason陳奕迅首hit歌。即係乜？咪《浮誇》囉！