Rita前排畀泛民班立法會議員窒到無聲出，話要知道香港迪士尼樂園係咪爛到入心，吓吓要佢交番樂園過去三年條數出嚟過目先投票，話以債換股再叉隻腳落去，等於無底深潭，質問佢有冇計過上海起迪士尼嘅因素？

仲記得當日喺立法會上，Rita游說議員支持，用嘅口脗係上海係咪起都未知，畀議員窮追猛打問傾擴建期間有冇同迪士尼提出上海唔好起迪士尼嘅要求，佢仲實牙實齒咁話「我有表達強烈意見」！

自爆曾「一腳踏兩船」

尋日啱啱係Rita坐正做局長一周年，殊不知佢喺大氣電波就轉晒軚，話美國都可以有兩個樂園，中國咁大、人口咁多，而且經濟發展勢頭好，相信唔應該有衝突。亦都可以說香港嘅迪士尼樂園已經發展咗，可以畀好多經驗，當上海發展時參考！

佢喺節目度講過，做局長有好多政治考慮，因為政策決定唔係樣樣都可以釐定到絕對錯或絕對啱，作一個判斷，亦都要睇吓當時嘅情況而定，因時制宜。今次佢就教曉大家講嘢都要因時制宜，投晒票、氹啲議員落晒疊，擺到明過咗海就係神仙啦，話轉就轉，仲向上海大送秋波添！

咁都未算，佢仲自爆埋佢當年「一腳踏兩船」嘅經驗。話說佢七六年畢業後第一份工嗰頭應承去一間學校教書，呢頭又答應做政府工。於是乎返到學校第一件事就同校長講拜拜，話抱歉要辭職，因為十月一日要加入政府，啱啱好一個月通知，搞到間學校一開學就又要請人填補。好彩個校長明白事理，認同呢個係好機會，無條件放人啫，唔係就搞出個大頭佛！