梁漱溟何以對價值不菲的字畫無動於衷，卻對兩本字典情深獨厚？據他解釋：這兩部書是向外地的學生借的，若燒毀就無法物歸原主了。紅衞兵哪管你「情與義，值千金」，毫不理睬，輕蔑地說：「不用了，我們是革命的紅衞兵，有《新華字典》就足夠了。」由於精裝書不易燒毀，紅衞兵就一頁一頁撕着燒。

「有《新華字典》就足夠了！」無知就是一種動力。當然，香港的學生是不會明白紅衞兵這種心態的。報上說：中學適齡學童人數持續下降，去年小六升中仍有七萬一千多人，今年少了三千八百多人，只得六萬八千人，如果一班三十五人，即係少咗一百多班，唔怪之得啲唔係Band 1嘅學校要「全包宴貼錢」去吸引學生，贈品之豐富，出手之慷慨，你簽信用卡簽到日月無光，換領嘅獎品都未必有咁豐厚！

香港幾好都有！只要你肯孭起個書包就有運行！你睇！有中學送課本、校服、全年午膳、校車津貼、手提電腦等招收中一生，就差沒說：若能從一而終，沒有轉校，中五畢業奉送日本遊及東京迪士尼套票兩張！若然介紹內地親友跨境來讀，足可湊夠一班者，恭送住宅單位一個，絕不取巧！

當年筆者升中試肥佬，要捱私校，學費貴，每次測驗考試唔合格，除了藤條炆豬肉，重要罰跪地主！所以話，遲啲出世，真係幸福好多！以前愛開玩笑：報名送叉燒飯！如今，冇十二頭吉品鮑宴，睬你都傻，隔籬校有黃油蟹宴一席啊！所以話，家無細路升讀中一，等同升市冇貨揸手！