立法會教育事務委員會尋日討論新高中課程問題，多個團體代表炮轟政府冇提供足夠資源畀學校推行通識教育，更有議員話，如果政府有乜行差踏錯，對學生嚟講係一場「大災難」。

嘩！認真大劑噃，不過議員一啲都冇講錯。通識科公開考試二○一二年開波，眨下眼就到，但家長同學生嘅憂慮有增無減，學校又未做好準備，政府更加闊佬懶理，無論資源提供定專業支援都唔足夠。

查實，有關新通識課程嘅爭議一直未停過。擴闊學生視野同知識，增強思考分析能力，冇人會反對。不過，通識教育範圍廣闊，包羅萬有，教乜嘢、點樣教，都要諗清諗楚。至弊當局連評分標準都烏吓烏吓，仲鬧出大笑話添。早排有機構請咗個本地知名文化人回答通識科試題，然後請資深老師批改，結果得啖笑，答案唔Pass不特止，三位老師畀嘅分數亦有好大差異。

叮！有人擔心考評局閱卷員評分欠缺可信性，唔係冇理由㗎。你話第日考公開試，阿甲同阿乙答案相同，但分數就差天共地，咪盞攞嚟拗。班考生畀人玩死，邊個孭鑊先？

政府推行通識教育得個講字，連合資格嘅教師都唔夠。新學年仲有個幾月就到，教呢科嘅教師入面，仲有三百幾位從未受過任何相關專業訓練。當局惟有臨急抱佛腳，利用暑假為佢哋提供三十幾個鐘嘅「密集訓練」頂住檔先。家陣講緊教書育人，唔係私家車考牌噃，現買現賣咁鬼兒戲，直頭係誤人子弟啦。

仲有，部分學校因為開辦通識科目唔夠資源，焗住要取消好似中西史呢啲科目。通識教育需要足夠嘅知識基礎，連孔聖人、拿破崙係邊個都矇查查，點讀得「通」？簡直係知識倒退啦。

話到尾，政府根本就口爽荷包立，學人搞通識教育，又唔提供額外資源。通識科依家連專門嘅課本都冇，市面上有關嘅參考書，價錢相差近十倍。當局又話唔會審查通識科教科書，學生同家長無所適從，唔知買定唔買，想買又唔知買邊本至啱。教育局副局長陳維安回應話，鼓勵教師用社會上現有資源施教，唔建議通識科用教科書喎，擺到明又係卸膊啦。

通識教育雖然有佢嘅特性，但唔等於當局乜都唔使理。依家人又冇，錢又冇，教師唔夠，教科書又話要學生自己搞掂，評分標準更加亂晒大龍，同學仔聽到都怕怕啦。高官話通識科教學冇問題，既然咁有信心，就唔好一個二個將自己仔女送去外國讀書喇。叮！