海洋公園主席盛智文獲得續約後未幾便宣布逆市加價，而且一加就達兩成，搞到旅遊發展局主席田北俊連番開炮，佢尋日同扮嘢文出席一個活動時，又插海洋公園逆市加價不利香港，不過，佢同扮嘢文兩個都係高手，台上嗌交、台下就攬頭攬髻，不知幾老友。
據知，旅發局連續發炮，搞到海洋公園都怕怕，高層日前已開口叫旅發局高抬貴手唔好再鬧，話晒大家坐埋一條船。扮嘢文同田少尋日一齊出席三碌拎嘅場合，不時咬耳仔，由於天文台發出三號風球，佢哋冇得坐纜車。田少再次斥責海洋公園嘅加價決定，佢話，家吓經濟環境唔好，旅客揀旅行目的地好睇價錢，「唔通旅發局喺海外話邊樣邊樣加價咩？」
扮嘢文急急解釋話同田少老友鬼鬼，已向佢解釋加價係無可奈何，海洋公園為擴建借落唔少錢，唔似得迪士尼有政府泵水；如果唔加價，每個月淨係蝕息都蝕到入肉。
不過，田少繼續咁狙擊係有理有據，田少話，海洋公園用五十五億元擴建，但一半係政府畀，四分之一喺儲備度攞，只有四分之一要問銀行借，所以實質要還嘅錢唔多。