本文重點
天文台尋日發出三號波，風雨有時都幾大吓，立法會議員李慧琼（Starry）聯同黨友、油尖旺區議員蔡少峰喺大角咀嘅聯合辦事處揀正尋日開幕，發展局局長林鄭月娥、教育局局長孫明揚及環境局副局長潘潔都畀面撐場。不過，風雨不時來襲，好彩典禮期間短暫放晴，令活動有驚無險。
暑假帶囡囡玩餐飽
Starry仲趁高官撐場嘅機會玩突擊，佢向林鄭話，政府推出樓宇更新大行動推動舊樓復修，但大角咀舊區就做得唔係好夠，希望讓更多大廈受惠。之後又狙擊孫公，話區內好多校長反映該區未能全面實施小班教學，希望孫公畀學生多啲選擇喎。
暑假已到，但Starry公務繁忙，要早出晚歸，返屋企時囡囡已經瞓咗覺，所以佢的起心肝，決定暑假中抽時間帶囡囡到海洋公園或迪士尼樂園玩餐飽。