12/07/2009

播放本新聞相關短片

政情:王永平跳槽城大教碩士生

前工商及科技局局長王永平退休之後,進身學界,更因幾度大鬧煲呔曾,做咗敢言嘅時事評論員。最近我哋八到,平叔做埋學界嘅當紅炸子雞,聘書收個不停,話同一時間幾份筍工等緊佢一啲都唔誇張。原本已喺港大、中大教開書嘅平叔,最近決定離開兼職任教咗兩年嘅中大,跳槽去城大全職教授公共政策及管理文學碩士課程,即係話第日全職教城大,兼職教吓港大。

據悉,平叔已原則上答應城大邀請,教授一個公共政策及管理文學碩士課程,今次仲係全職工作添,所以要放棄教咗兩年嘅中大兼職教席。平叔接受我哋訪問時解釋,今次棄中大而取城大,純粹因為後者係教碩士生,報讀嘅學生有好多都係現職公務員或公營機構人員,有多啲機會直接用到佢啲實戰經驗,滿足感大好多。而港大由於係佢母校,佢點忙都希望繼續任教。平叔強調跳槽絕對同錢冇關,因根據公務員規例,佢一有全職受薪工作就要停發長俸,一加一減收入相差唔遠。