立法會議員喺議事堂拗到面紅耳熱不出奇，但喺公共場合也毫不相讓，香港青少年領袖發展協會搞咗個「香港模擬立法會」活動，請咗幾個立法會議員上去，包括專業議會嘅梁美芬（鼠王芬）、公文袋嘅梁家傑（袋巾傑）同工聯會嘅黃國健（KK）。本來係請佢哋同班中學生分享吓議會文化，點知最後變咗嗌交大會，差啲嚇親啲學生哥。
鼠王芬一開波話絕對唔會認同一啲喺議會入面掟嘢嘅文化，袋巾傑就話依家理性論政空間愈嚟愈窄，一係就好似民建聯譚耀宗咁，一係就好似社民連黃毓民咁，但具體就冇解釋落去。點知就喺呢個時候，鼠王芬忽然發聲，狂轟泛民係「人肉錄音機」，無論討論咩議題，最後都要講番去七一同政改方案，仲大大聲鬧泛民「好奸茅」！畀鼠王芬一激，袋巾傑啲君子風度飛走晒，還拖要佢畀例子，呢兩位法律界人士揸住咪愈拗愈大聲，場內嘅學生都唔知畀咩反應好。
同場嘅KK黃國健焗住做和事老，話依家嘅立法會唔算暴戾，但就有語言暴力，最後以一句「依家議員間缺乏互信」嚟完結呢個話題，否則都唔知雙梁仲要拗幾耐。