被指潛水 孫公冇唔高興

孫公同發叔都係長袖善舞之人，尋日佢哋兵分兩路，發叔帶住鄉議局兩名副主席張學明、林偉強去梅窩，聽居民對正生遷校嘅意見，發叔事後話，梅窩居民主要係擔心正生書院將來學生人數增加之後，會形成一個小社區，潛台詞即係學生人數如果大增，對區內環境一定有影響。佢仲話，希望事件可以很快解決。

另一邊廂，孫公都出席一個公開活動，講到正生書院，佢同發叔嘅口徑出奇地相似，佢話正生書院正考慮緊鄉議局嘅選址，希望盡快有答案。佢哋不約而同披露嘅訊息都係正生事件好快解決。被問到孫公一度被指喺事件中潛水一事，官場老手孫公氣定神閒咁話：「我做公務咁多年，又點會為呢啲事唔高興呀！」

點都好，尋日打緊風，發叔同孫公都分頭出動，一文一武為正生事件奔波，足見正生遷校梅窩嘅消息似真嘅多。據講，發叔同鄉議局高層尋日現身梅窩，目的不外乎向鄉郊選民及村民作最後安撫，了解佢哋對正生遷校嘅最後意見。政府稍後宣布事件時，又會一併公布梅窩居民憂慮嘅改善方法，咁就唔會順得哥情失嫂意啦。呢個就係孫公同發叔尋日分頭演出嘅原因啦，到依家，相信大家都唔會奇怪點解佢哋兩個唱腔、做手咁夾啦？人生如戲，正生事件都好似一台戲啫。