咳，邊個唔知坐喺屋企歎冷氣、睇電視梳乎吖。勞工及福利局嘅最新數字話，全港四十八萬幾攞綜援嘅人入面，有公屋住嘅得三十三萬多啲，剩番嗰十五萬唔使講都知，多數都住喺環境惡劣嘅木屋、鐵皮屋、天台屋同板間房。

叮！唔使親身體驗，淨係想像吓夏日炎炎喺呢啲「桑拿房」踎幾粒鐘，已經標晒汗啦。呢嗱，本報記者去過部分單位量度，就算打開窗開埋風扇，室內溫度比戶外最多高出四點五度，按尋日最高氣溫三十三度咁計，屋入面成三十七點五度，仲高過人嘅正常體溫，點頂吖？唔怪得愈嚟愈多窮人夏天寧願去瞓街，做「季節性露宿者」啦。

講起真係悲，上個月葵涌一間木屋嘅男戶主懷疑為咗慳電唔開風扇，喺屋企瞓晏覺嗰陣熱死咗。天氣愈嚟愈熱，咁多市民被迫焗喺「蒸籠」入面，睇怕熱死人嘅悲劇陸續有來。勞福局局長張建宗咪淨係識撳機統計綜援戶數字，唔該快啲搵埋其他部門諗計救吓班窮人啦，唔通真係要熱死多幾個至做嘢？

暑天瞓覺夾生熱死，商場成為「避暑勝地」，呢個既係窮人嘅悲歌，更係香港嘅恥辱。政府成日吹水話香港係國際大都會，但係繁華背後貧富懸殊愈拉愈大，貧困人士生活質素愈嚟愈差，長期身處「不易居住」嘅惡劣環境，成班高薪厚祿嘅官員就詐睇唔到。

聯合國年前嘅調查顯示，香港貧富懸殊冠絕亞洲，堅尼系數已經高達零點五三三，亞洲排第一，仲嚴重過非洲國家，打工仔最高同最低收入群相差幾十倍甚至更多，港島灣仔區同九龍深水埗區住戶收入嘅差距亦高達一半。

叮！政府開口埋口「以民為本」，但扶貧政策就認真丟架。當年煞有介事成立扶貧委員會，話要縮短貧富差距，點知扶咗幾年，愈扶愈貧，貧窮人口竟然由一百萬扶到一百三十幾萬，足足多咗三成，搞到連扶貧委員會都要收皮。

香港到底有幾多窮人？政府拒絕清楚界定點至屬「貧窮」，依家連確切數字都冇。不過，如果按「國際貧窮線」計算，全港生活喺貧困線以下嘅人已經接近一百五十萬。有扶貧機構研究人員形容政府扶貧政策「衰到貼地」，真係應棍。

叮佢個鎯鎯！香港依家貧者愈貧、富者愈富、中產向下流動、窮人愈嚟愈多，專家學者話呢個係典型嘅M形社會特徵。其實，計太一叮話齋，呢個係「畸形社會」就真！