港澳兩地嘅特首選舉最近又被炒熱，尋日喺一個政黨嘅酒會上，賭王何鴻燊公然點評兩地特首候選人，既力撐崔世安係合適人選，又開盤賠率十賠一，估唐唐做特首嘅機會高過為人「古板啲」嘅梁振英（CY），但一路冇提過「鬍鬚曾」曾俊華。
賭王一講到澳門特首選舉，一如既往力撐除崔世安外別無他選：「崔世安啱晒，最適合做澳門特首。你要記住，做特首要斷六親，咁至做得㗎！」擺明對今日發表政綱嘅崔世安投下百分百信任票。
另外，三名疑似香港特首候選人，即係唐唐、CY同鬍鬚曾，尋日酒會一網打盡，難得嘅係賭王即場開盤受注。大家問賭王邊個最適合做特首，佢答：「我贊成最熱門嗰個。」然後多次暗示指唐唐，貪佢任職過政府多個位置，「夠熟手」，夠穩陣喎。講到興起，佢仲好豪氣咁講：「賭吓吖，我十賠一，你賭幾多錢都殺你！」
講到CY，賭王就笑笑口咁講：「嗰個就古板啲。」又話最近有豬流感，少出街食飯，暗示CY冇搵過佢傾偈。至於做特首係咪要識上海話，賭王話：「最緊要識廣東話，係香港人。」