每個煙民背後都有一個食煙嘅理由，好似馬會主席阿John陳祖澤亦係資深煙民，佢自爆讀大學時因為想扮大人，於是膽粗粗加入煙民一族，自此想戒都戒唔甩。

佢笑言當年因為貪玩，見到大學宿舍唔少同學擔住口煙，於是有樣學樣食埋一份，一食就上癮。佢都好似好多人咁諗過戒煙㗎，可惜因為冇借助戒煙用品，齋靠意志力搭夠，結果試咗幾次都失敗，轉頭又心思思食番。

話時話，佢嘅煙齡大大話話有幾十年，但煙癮唔算深，每日只食半包，相當節制。講起擴大禁煙範圍對佢有乜影響，佢輕描淡寫咁話冇所謂：「嗰度唔畀食咪唔食囉！」

答得咁輕鬆，皆因佢有個食煙「私竇」，就係佢屋企嘞！阿John話，屋企係佢嘅「最後堡壘」，就算全港禁晒煙，照樣可以匿埋喺屋企食餐飽。相信好多煙民同阿John一樣，但佢有冇諗過要家人食二手煙，禍害一樣咁大㗎！