正生書院遷址想落戶梅窩激起千重浪，鄉議局向正生另議六個選址，不過最終結果極有可能係返回起步點。最新消息指，「新界王」劉皇發身邊嘅人最近開始接觸梅窩居民，游說佢哋接受正生喺梅窩落地生根，而發叔今日就會入梅窩，同班鄉紳傾正生問題。
其實發叔有意調整策略，早已有迹可尋。上禮拜六，紡織界立法會「蘇菲」梁劉柔芬出動私伙遊艇，載「大舊」陳偉業等幾位立法會同僚入芝麻灣探訪正生書院，蘇菲總結行程時，為正生風波提咗個解決折衷方案，建議戒毒學生日後首階段照舊先入讀正生長洲校舍，改善後再轉到第二階段嘅正規學校上課。
蘇菲同發叔分屬經濟動力戰友，大舊喺新界西又一向同發叔有偈傾，蘇菲呢個方案，講唔定就係發叔游說梅窩居民嘅腹稿。