就喺立法會抖暑休會前夕，商務及經濟發展局前兩日向立法會提交文件，交代公共廣播服務檢討進展，但係，一個關係港台存續嘅檢討，當局用咗一張半紙就交代晒個進度，相當兒戲。不過，呢份文件都可算言簡意賅喎，喺最後一段，唔起眼咁插咗呢一句：「研究工作現仍在進行中，而研究過程中亦出現很多檢討委員會當時未有涵蓋的課題，因此有關工作比原先估計更為複雜。」咁即係點呀？潛台詞即係預告政府要用更長時間去研究檢討報告囉。

其實，煲呔曾三年前搵傳媒教父做呢份公共廣播服務檢討報告，歷時一年多，檢討委員會涵蓋唔到嘅課題，都唔慌緊要得去邊，政府擺明搵藉口，想將推出諮詢文件嘅時間表可以押後嘅都盡量押後就真。

蹉跎歲月錯失時機

講穿咗，政府當年好大喜功，想借斬殺港台立威，但係出師不利，蹉跎歲月，依家已經錯過咗最適當嘅時機，一嚟因為金融海嘯爆發，庫房空虛，你估安撫港台班員工唔使錢呀？二嚟煲呔曾政府已經變咗弱勢政府，過去半年，稍具爭議性嘅都收埋唔敢出台，更何況係牽涉到言論自由敏感問題嘅公共廣播出路諮詢？

所以話呢，由檢討報告好似燙手山芋咁出台，到後來受壓後，政府直情將份諮詢文件擺埋一邊攤凍，博冇人理，依家擺明係想將呢份諮詢文件打包，放入雪櫃，無限期冰封。