有關注團體上個月派人以新生身份「放蛇」，打電話去多間院校了解副學士收生情況。調查發現，院校招生各師各法，唔單止七國咁亂，仲有掠水之嫌。呢嗱，淨係報名費差別都已經嚇死你，呢間收一舊水，嗰間收五百皮，就算冇錄取都唔會回水。

唔同院校教學質素差天共地，有啲雖然官方網站話平均一個老師教二十一個學生，實際上係一個對八十個，有啲班仲超過一百個學生，返學熱鬧過趁墟，班房變咗嘩鬼學堂，喺咁嘅環境上課，點讀得入腦吖！

咁都未算最離譜，大部分副學士課程宣傳廣告都冇透露全面資料，而係選擇性吹水，連有幾多學員升讀大學嘅詳細數字都唔披露；有啲標榜可以為學員提供百分百就業保障，但原來係作大，其實要平均分（GPA）達到三以上，至可以包搵工。

叮！學生自資讀副學士（就算有政府貸款都要連本帶息還債），最關心嘅就係課程教學質素、學歷認可同就業率。點知呢啲關鍵資料唔係做咗手腳，就係乾脆唔提供。讀咗幾年，錢就使咗，嘢就學唔到，升大學無門，搵工冇人要，簡直係靠害。教育機構變學店，唔怪得參與調查嘅組織要求政府加強監管啦。

其實，副學士不過係政府當年為應付後生仔女畢業變失業作出嚟嘅虛銜，等佢哋留喺校園暫時唔好加入失業大軍。但係課程唔止收費偏高，而且學無所用，冇認受性。資料顯示，有啲院校嘅副學士畢業生，繼續升讀大學唔到三成，剩低嘅，有三成連工都搵唔到。

叮！前面冇運行，後面冇退路都未夠慘，呢班後生仔女仲要畀無良學店當「人質」。唔少教育機構為爭取政府資助，爭先恐後開辦課程，名為有教無類，實際上見錢開眼，將所有入唔到大學，甚至連中五會考中英文唔合格嘅學生亦一網打盡。教學質素無保障，一幢大廈租幾個課室就話辦副學士課程，設施連中學都不如，有啲連圖書館、電腦都冇。正一人人有書讀，個個冇希望。

早排有學生組織發起「失業禮大遊行」，要求正視副學士學生面對嘅困境。副學士課程開咗咁多年，亂足咁多年，學生同家長鬧足咁多年，完全係因為政府只當佢係權宜之計，既冇周詳規劃，又冇嚴格監管。

政府冇吸取副學士嘅教訓不特止，仲將教育服務定為本港「六大優勢產業」之一，衰完又嚟衰過。唔通累完香港都未夠，仲要累埋左鄰右里，累埋全世界？叮！