新加坡航空公司引入全球最大嘅A380空中巴士飛來往香港同新加坡嘅航線，尋日喺機場舉行首航典禮，呢架「空中巨無霸」吸引咗一班貴客，包括信和置業集團主席黃志祥。
信置係香港嘅老牌地產商相信大家都知，而主席黃志祥係地道新加坡人，佢爸爸黃廷方就係新加坡遠東集團嘅創辦人，同時係星洲嘅大地主，所以黃志祥不時都會飛去新加坡巡視。今次唔知咁啱定特登，買咗A380嘅首航機票，成為香港「巨無霸」嘅第一批捧場客。
得到大地產商支持，新航香港區總經理Campbell Wilson立即過嚟招呼黃志祥，傾咗幾句就同黃志祥一齊喺頭等艙嘅櫃位登機。雖然黃志祥係一代富豪，但凡事都親力親為，仲見佢自己攞住一個篋同兩袋嘢登機，相當親民。