新疆烏魯木齊近日爆發暴亂，至今仲未平息，好多旅行團都臨時取消當地行程，但立法會議員「象哥」黃定光就話冇有怕，一家大細會如期下月出發去新疆。象哥之所以咁堅持，除咗此行係由當地政府邀請、有安全保證外，最大動力就係秉承父親喺貧窮地區辦學嘅遺願，考慮捐錢喺當地興建學校。
象哥爸爸生前好關心內地教育，捐錢喺全國最貧窮嘅貴州同新疆興建逾八十間學校，臨終遺願係希望能夠興建過百間學校，象哥於是同哥哥姐姐合力達成父親遺願，多年嚟喺內地累積興建超過一百二十幾間學校，超額完成。最近新疆政府邀請象哥到當地視察，估計係想游說佢再「加碼」捐錢起學校，或者到當地投資。
由於下個月先起行，象哥估計到時局勢已回復穩定，加上有政府接待，安全應該唔成問題，但為穩陣起見，佢話訂機票前會先了解最新局勢。