前日立法會政府帳目委員會發表報告狠批平機會，為過去一年嘅辛勞工作畫上圓滿句號，又到咗慶功嘅時候。由於主席「IQ博士」黃宜弘早前已請過班委員食飯，今次就輪到副主席陳茂波做東，今晚喺跑馬地馬會會所開餐。
眾所周知，IQ博士係酒仙，佢尋日話後生時喺美國做專業工作，唔使逢場作戲傾生意，所以一直都唔識飲酒，直至三十二歲回流香港從商，畀人灌灌吓就愛上呢種嗜好，仲最鍾意飲烈酒茅台。
咁今晚會唔會同班委員飲鋪勁？佢話啲委員全部都係一杯起、兩杯止嗰隻。咁即係話冇人夠佢飲啦！但佢仲有個最後希望嘅。邊個？就係上次冇嚟食飯嘅議員李慧琼嘞，睇吓呢位帳委會唯一女將嘅酒量得唔得先。