白鴿黨立法會議員黃成智今年四月畀本報踢爆，喺舊年立法會選舉期間虛報職業為註冊社工後，佢當時話只係「大頭蝦」，仲專登開咗個記招表明會盡快向法院提出呈請尋求寬免。但事隔兩個半月，上禮拜五致電問佢到底幾時入稟，佢含糊咁話：「差唔多喇。」跟住又話：「唔方便回應。」拒絕解釋。
點知本報禮拜一出咗篇《虛報社工黃成智玩拖字訣》嘅報道，「提醒」佢仲未呈請後，佢竟然喺前日好鬼祟咁走去法庭入稟，做法同之前大鑼大鼓叫記者去採訪佢到社工註冊處重新註冊嘅做法截然不同。
尋日再向佢查詢呈請嘅細節，佢只係話排緊期上庭，之後有關遲遲唔提出呈請嘅原因、入稟狀嘅內容通通拒絕回應。有政界人士認為黃成智喺宣傳單張都有自稱社工，法庭未必相信佢係唔小心而批准寬免，所以佢惟有一拖再拖，等件事淡化後先行動。