立法會前日表決兩項有關落實政府債券計劃嘅決議案，其實只有個別泛民主派有啲異議，但政府依然好緊張，早喺上禮拜五起不斷急call建制派議員，聲稱兩項決議案嘅票數都好緊張，希望佢哋喺當日下晝六點四十五分後，坐定定喺議事廳等投票。
叫得做建制派，自然要喺政府有難時護航，部分議員被迫臨時取消原來嘅晚宴安排，身在新加坡主持亞青運動會閉幕禮嘅體育界議員霍震霆，更加要臨時提早上機趕返香港。
點知首項決議案有四十票贊成，只有十三票反對，立即引起建制派嘩然，質疑鬍鬚曾心虛亂call佢哋返嚟撐場。霍公子同富貴黨張宇人等仲好似好不滿咁立即執嘢走，搞到另一項官債決議案無緣無故少咗五張贊成票。有建制派議員更私下表示，以後鬍鬚曾再搵佢哋箍票，一定會再三諗清楚先。
最離譜係鬍鬚曾尋日回應七．一遊行動議時，仲敢借金融海嘯幫自己貼金：「我並唔係要自吹自擂，誇耀我哋對抗金融海嘯嘅成績；相反喺過去一年內，我哋幾乎每日都喺度反省……」班無啦啦畀佢call返立法會嘅建制派議員聽到，肯定又興多幾錢重。