田少剛質疑扮嘢文食言

由富貴黨方剛發起嘅齊抗金融海嘯大聯盟，一連八個月嘅派發「消費優惠券」行動已進入第三波，七月份嘅主題係「夏日旅遊購物紛紛FUN」，主打吃喝玩樂，賣點之一，係得到香港三大旅遊景點，即係三碌拎、海洋公園同迪士尼樂園嘅支持，入場有折扣。所以，大聯盟聽日為活動舉行啟動儀式，扮嘢文同金民豪順理成章做主禮嘉賓，田少係旅發局主席當然走唔甩，造就呢次三雄相逢嘅經典場面，真係冤家路窄囉。

田少同扮嘢文有牙齒印早喺旅遊界傳開，話說喺今年農曆年，海洋公園高調退出旅發局主辦嘅新春花車巡遊，已將雙方關係惡化枱面化，所以，海洋公園早前宣布加價兩成，田少毫不留情面，喺大氣電波隔空狠插海洋公園唔合理，仲質疑扮嘢文食言添！田少窒完扮嘢文唔夠一個禮拜，兩人聽日狹路相逢，肯定擦出火花，精彩過睇殺人鯨跳圈。

至於扮嘢文同金民豪，更加可以用「天敵」嚟形容佢哋，海洋公園同迪士尼樂園本身就係競爭對手，鬥吸人流、鬥口碑，鬥生鬥死，勢成水火，扮嘢文精於扮鬼扮馬博出鏡，今日罕有咁同金民豪同台演出，唔知佢用乜新造型搶鏡呢？金民豪又會出乜招數抗衡扮嘢文，為迪士尼爭一口氣呢？真係好戲連場。

根據大聯盟安排，儀式結束後，田少、扮嘢文同金民豪會一齊搭三碌拎上昂坪市集，喺呢大約半粒鐘嘅車程，三人焗變困獸鬥！