當局準備引進救護車調派分級制，喺呢個制度下，傷病者危急或有生命危險列為第一級，白車以九分鐘內到達為目標；第二級係傷病者嚴重但無生命危險，目標十二分鐘內到達；第三級係非危急個案，目標二十分鐘內到達。

表面睇，危急個案係比依家白車一律十二分鐘內到達嘅目標快咗三分鐘，問題係，單憑控制室人員隔空斷症就決定邊個係危急，有冇兒戲啲呀？救人隨時變害人呀！

立法會保安事務委員會尋日討論分級制，議員即刻炳到七彩。有議員認為救護服務人命關天，就算係急症室醫護人員，亦需要同病人面對面至可以分流。又話明愛醫院職員喺門口有人心臟病發都唔識處理，隔住電話分級，點可能冇問題吖？

議員嘅憂慮唔係無的放矢㗎，據消防處救護員會主席屈奇安指出，外國引入救護車調派分級制，通常都會有輔助醫療資格嘅救護員喺控制室協助分級以及指導療傷，但依家香港控制室人員冇救護專業資格，試問點可以判斷傷勢以及指導療傷？

最大劑嘅係，打電話求救竟然要回答N咁多個問題，又呢樣又嗰樣，未答完可能已經一命嗚呼啦。如果有個病人明明心臟病，但慌張講到好似胃痛咁，一級變三級，遲咗黃金幾分鐘搶救時機，到時白車可以慳番，派架黑箱車去好過。

難得消防處副處長陳楚鑫咁樂觀，佢話根據現時資料預計，喺未來三級制之下，將會有三成傷者係屬於第一級，相信未來資源能夠應付，唔會出現延誤救援嘅情況。

叮！唔好吹水啦！命仔要緊，可以想像到時市民求助時，老虎蟹講到有咁嚴重得咁嚴重，個個變晒一級啦。有議員亦擔心，分級制會對控制室人員構成好大壓力，到時佢哋可能唔想孭鑊，寧縱毋枉，一於將大部分個案變成一級。

所以呢，只要頭腦稍為正常嘅人，一諗就知呢個分級制係無事生非(口架)啦，但點解班高官會蠢成咁呢？你以為佢哋蠢啦，查實班友仔都唔知幾精甩辮呀。有議員認為呢個三級制只係為救護服務收費鋪路，到時如果有大量個案被誇大為第一級，政府就可以話要收費防止濫用。

咁漏洞百出嘅分制級，唔單止畀好多議員狂轟，有救護員都講到明唔支持。鬼咩，依家佢哋做到冇停手，連食飯時間都冇，擔心實施分級制後，工作量會更加爆燈，到時何止冇飯食，廁所都冇得去呀！事實上，有議員批評新制唔加資源，隨時仲衰過舊制呀。

叮佢個鎯鎯，係人都知問題癥結係救護員人手不足同埋白車殘舊，但當局竟然度埋呢啲本末倒置嘅屎橋出嚟，太一叮可以隔空斷症，呢個政府肯定係一級危急病重！叮！