重蹈覆轍失言中泛民下懷

按規矩，從未喺答問大會發問過嘅議員可以優先，咁今日就有十二個議員可以優先問，其中半數係泛民主派嘅議員，由於呢次係今個立法年度最後一次答問大會，又係七．一後煲呔曾首次落立法會，所以班議員都會盡地一煲，狂質煲呔曾，仲會設氹等佢踩落去。

既然煲呔曾係氣候逃犯，當然唔少得要交代點樣應付全球暖化，啲議員梗係唔會畀佢唸口簧，淨係話政府唔用鎢絲燈泡咁簡單就過骨，肯定質到佢口啞啞。

煲呔曾上兩次喺答問大會都講錯嘢，先係「狗噏」，跟住就爆出六四「代表論」，班泛民議員食髓知味，實行重施故技，夾晒計話會好似上次咁有層次咁逼煲呔曾回應七．一訴求，逼到最後，煲呔曾可能會重蹈覆轍，發老脾爆出啲鬼話，若果又再失言，就中正泛民下懷，泛民又可借題發揮。

而前日雷曼苦主包圍禮賓府，仲同警員發生衝突，泛民今日亦會就此窮追不捨。

建制派亦唔見得會禮待佢，事關佢愛將財爺鬍鬚曾尋日又做咗個過分樂觀嘅經濟前瞻，已經即場畀人鬧鑊勁，今日有議員亦準備質問煲呔曾條數係咪咁計，到時煲呔曾口風唔同，就變咗「孖曾」互摑，又有好戲睇。

咁多個氹，真係踩中邊個都死，就睇吓煲呔曾識唔識得飛天嘞。