咦，好似冇乜聲氣咁？

鬼咩，唔係小市民唔想用少啲膠袋支持環保，問題係好多人連邊啲膠袋要徵收，邊啲地方唔使徵收，至今依然矇查查，唔報以噓聲兼掟雞蛋都偷笑啦。

呢嗱，港府尋日將條例涵蓋嘅徵稅產品資料上載環保署網頁，要徵稅嘅一般包括食品飲品、藥物以及衞生美容用品。

「一國兩制」就話聽得多啫，原來連「一店兩制」都有，好似話毛巾、沐浴海綿之類嘅衞生用品，喺百貨公司嘅非超級市場範圍買竟然唔使畀膠袋稅喎。而便利店亦都係咁騎呢，有啲貨品要收膠袋稅，但店內熟食部有部分又可以豁免，小市民真係搞到頭都大埋。

有環保團體近日做過調查，冇錯係有超過九成受訪者知道膠袋稅嘅實施日期，但係有四分之三受訪者唔太清楚徵費目的以及條例細則。最搞笑嘅係，有兩成受訪者仲以為政府收膠袋稅只係為咗增加庫房收入以及加重市民負擔。

咁就梗係啦，政府成日開口埋口話預期每年徵收嘅膠袋稅可達一至二億元，而呢筆錢又講到明會入庫房個袋，唔會直接用喺環保工作方面。叮！司馬昭之心路人皆見，唔係為咗掠水？講都冇人信啦！

另外，有近七成受訪者唔知道萬寧或屈臣氏呢啲店舖要畀膠袋稅；約四分一人唔知道便利店要徵費；有超過三成市民誤以為所有藥房都要畀膠袋稅，可見呢個膠袋稅嘅宣傳推廣係幾失敗吖。

嗱嗱嗱，膠袋稅殺到埋身，近日環保署至施施然將二千多間登記店舖名單上網，而且只係得英文版。叮！膠袋稅又唔係一朝半日至決定，當局老早就應該準備妥當啦，好明顯就係環保署做嘢立立亂，趕唔切準備中文名單，求其搵英文頂住檔先啦。

仲有呀，依家商戶只係將宣傳張貼喺收銀機或列喺收據上就算，有啲商戶又唔係好想消費者預先知道有徵費，以免影響生意。可以想像得到，家陣經濟環境咁差，五毫子大過天㗎，由於政府宣傳資訊不足，有消費者擔心畀人收多錢，隨時嘈起上嚟都有之呀，膠袋稅最終只會吃力不討好！

事實上，膠袋稅未推出已經漏洞百出，未見其利先見其害。有塑料袋業界人士透露，納入徵費範圍嘅手挽膠袋定單近月的而且確跌咗四成，但唔好開心住，原來垃圾袋嘅定單，反過來勁升三成以上，不織布袋定單足足升咗五成。

邱騰華明知衰咗，仲懶先知先覺咁話實施徵費之後，不織布袋使用量會增加，如果循環使用，就可以減少垃圾。業界一腳踢爆，不織布袋用嘅膠料比同樣大小普通膠袋多三十至五十倍，而且一百年都未必分解到，其實仲唔環保呀！

叮佢個鎯鎯，香港空氣質素差到就嚟唔適合人類居住，邱騰華一於闊佬懶理，淨係識得度屎橋擾民，為社會添煩添亂。

計太一叮話齋，一日唔將呢啲廢官叮爆鎯鎯再回收處理，小市民幾難有日安寧，難保有日出街呼吸都要抽「空氣稅」呀！