尋日晏晝兩點左右，賭王何鴻燊千金超蓮同朋友喺銅鑼灣崇光一帶購物，招募人員見有靚女經過，一個箭步標前舉機影相，超蓮企定定任影唔嬲，記者上前問佢係咪有意應徵做模特兒，佢笑住話：「有啲興趣，但要返屋企問過媽咪先。」佢仲話自知工作經驗有限，想搵份暑期工都難，計劃喺媽咪開設嘅地產公司做實習生，暑假之後返英國升學。

超蓮有意加入「(口靚)模」行列，但三太即時透過秘書話：「超蓮咁細個，未讀完書，爸爸一定鬧，何太亦唔會畀。」仲話若然超蓮先斬後奏去試鏡，個廣告拍咗都冇可能出街喎！三太果然家教嚴。