有九龍城區議員投訴，喺上禮拜四嘅定期會面中，多名嚟自九龍西嘅立法會議員集體遲到，包括本身係會議召集人嘅民協馮檢基（KK）。

事前有九名議員報咗名，但夠鐘開會時只得富貴黨飲食界嘅議員「肥仔張」張宇人。之後秘書處職員收到KK電話，話肯定遲大到，叫其他到咗嘅議員代勞，於是肥仔張惟有頂硬上。

二十分鐘過去，只見旅遊界嘅謝偉俊蒲頭，兩人惟有硬住頭皮宣布開會，再過幾個字，KK先趕到，跟住就係另一九西議員白鴿黨嘅涂謹申。身兼九龍城區議員嘅九西立會議員梁美芬仲離譜，喺散會前幾分鐘先趕到，仲反過嚟叫大家唔好食飯住，等佢發表埋兩分鐘偉論先，令眾同僚更火滾！至於餘下嗰兩名九西議員則一早告咗假。

KK事後解釋喺七．一遊行行到腳抽筋，先會遲咗出門口，已即場向區議員同肥仔張耍冧；阿涂就話當日喺立法會申訴部處理一宗個案；梁美芬話當日係囝囝小學畢業，所以先遲到。呢次會面早喺三四個月前就安排好，點解仲夾唔啱時間呢？