資深傳媒人馮美基尋日出書搞簽名會,得到一班好友嚟撐場,富貴黨前副主席「莎姐」周梁淑怡以行動支持,一出手就掃十幾本。
莎姐細女智琪生咗個女都未滿月,尋日佢又宣布喜訊,話大女智美會喺十一月生第二胎。數數手指,佢咪即係一年抱兩個孫、三年抱三個孫?兩個女都生咗個女,如果智美今次呢胎係男仔,一家人一定更開心嘞。莎姐係女強人,甚少落手落腳湊女,依家湊孫當然唔算熟手,仲自爆話前排以為孫女好曳成日喊,點知原來係肚餓至真,真係烏龍婆婆!
同場仲有令陳振聰有機會認識小甜甜龔如心嘅王麗明,佢話今次返港要處理啲私務。啲私務同陳振聰有冇關係呢?王麗明就笑笑口咁話唔再講嘞!