Moses本身係律師，大女Vena慧恩上個月考到美國律師執業資格，成家人陪佢去紐約領證書，仲順便旅行慶祝添。Vena唔單止有美國律師牌，喺香港同英國都係執業律師，佢平時處理開跨國企業嘅商業糾紛案件，睇嚟就快青出於藍。

Moses一家人尋日出席一個活動，講起Vena咁叻，Moses話平時冇畀壓力要Vena繼承衣鉢，最多都係等佢知道律師係做啲乜。

究竟教女有乜秘訣呢？佢話從來冇乜點教Vena讀書，原因係已經幫個女交咗學費，有乜學業問題都應該自己問老師！

但佢都有教女絕招，話要佢哋明白讀書係為自己，而唔係為氹父母開心。