尋日喺一個國民知識水平測試嘅比賽上,立法會資訊科技界議員「IT豪」譚偉豪同骨科名醫高永文「露晒底」,答錯唔少題目,認真老貓燒鬚。
話說IT豪同高醫生分屬兩隊,同小學生同台下市民鬥快搶答問題,可惜IT豪答錯中國加入世貿嘅年份。高醫生亦搞唔清中國喺邊一年申辦奧運成功,又記唔起聖火傳送嘅第一棒係蛙后羅雪娟,最後兩人都輸咗比賽,冇獎攞。
高醫生話輸贏唔緊要,志在參與啫!講開七月尾佢將會再度到訪四川,佢話當地災後重建進度神速,可惜受傷災民多不勝數,唔少災民到依家仍然未裝上義肢,部分受傷小童因為骨骼生得快,幾個月就等住換新義肢,所以佢要密密飛四川。