話說香港電台搞嘅《城市論壇》尋日講七．一遊行，一向言論惹火嘅金勞詹獲邀激辯惹火題目，台上另外三位嘉賓，唔係被視為支持民主派嘅學者，就係泛民立法會議員同民陣召集人，台下仲有成班「紅衫軍」叫陣，單睇牌面，金勞詹唔慌有贏面。

果然，金勞詹一開腔話七．一得七萬幾人上街，相對全港七百萬人只係小數目，旋即遭台上台下圍攻，佢畀紅衫軍噓得幾聲，心火上升，就出聲話：「我有權發表唔同聲音，唔准你哋喺度嘈。」

其後形勢愈嚟愈惡劣，金勞詹都㩒住自己把火，不斷叫大家尊重言論自由、虛心啲，但想降火反而變火上加油，台下年輕聽眾不滿佢話七萬幾人係「小數目」，台上嘉賓又成日搶佢白，明嘲暗諷，終於喺節目第三節都未完嘅時候，潮州怒漢就火山爆發，話：「我詹培忠絕對冇義務為特區政府講嘢，亦無意同大家意見相左，你哋要對抗，對唔住，我離席，我無謂同你哋講嘢。」

轟港台攞公帑應中立

金勞詹跟住起身Walk Out（離場），主持人急急挽留，金勞詹行咗幾步，返轉頭攞咪拋低一句：「我點解要嘥時間喺度浪費我嘅精神呀？對唔住！」之後拂袖而去，成為城市論壇近年嚟首個Walk Out抗議嘅人。

金勞詹步出論壇後，怒氣未消，批評港台攞公帑，應該中立啲，但係論壇形勢一面倒，對佢好唔公平，仲話：「唔中立，（政府）不如賣咗佢畀私營啦！」

主持人就解釋，本來有邀請建仔同富貴黨，但冇人肯上嚟，於是搵詹議員，佢肯嚟，港台梗係無任歡迎啦。哦，原來金勞詹做咗代罪羔羊！