尋日有旅遊界人士喺電台猛呻，因為金融海嘯同豬流感，內地訪港旅客比舊年同期急跌六成，業界整體營業額大跌三成。內地同胞最鍾意去嘅旺角區更加慘不忍睹，人流霎時間少咗一大橛，商戶生意大跌，尤其係食肆，上個月營業額少咗三分一，有啲甚至少咗一半，連租都蝕埋，正一蝕到入肉。

想知乜叫雪上加霜，睇吓旺角啦。大圍環境唔掂，預咗生意麻麻，至弊嗰啲會失驚無神從天而降嘅「鏹水彈」，搞到遊客同市民提心吊膽，步步驚心。

由舊年十二月到今年六月短短半年幾，旺角行人專用區先後發生三宗「鏹水彈」襲擊事件，總共有過百名途人受傷。繁華鬧市變成危城，遊客同市民諗起都怕怕，附近商戶更加首當其衝，成為最大受害者。

至弊呢個政府你急佢唔急，警方到依家都未破到案，疑兇係乜誰、作案動機係乜都毫無頭緒，連作案地點都係斷估。油尖旺區議會有關人士話，「鏹水彈問題一日未能解決，商戶生意始終最受影響。旺角行人專用區成為重災區，鄰近嘅女人街、波鞋街也未能幸免」。

政府淨係識守株待兔，翹埋雙手等鏹水彈狂徒再現身。商戶就日日吊鹽水，唔想慢慢陰乾嘅，惟有自己諗計。區內多個商戶上月中發起「自救行動」，收集咗十幾萬捐款，準備幫行人專用區內二十幾幢舊樓裝鐵閘同天台門，堵塞大廈「無掩雞籠」嘅保安漏洞，減低鏹水彈狂徒再度犯案嘅機會。

叮！當局口口聲聲「以民為本」，保護市民安全呢啲最基本嘅嘢都交唔到功課，仲要市民食自己，羞唔羞家啲吖！第一次「鏹水彈」襲擊案發生之後，區議會已經通過安裝俗稱「天眼」嘅閉路電視系統，防止再次遇襲，點知政府遲遲都未裝。拖咗好幾個月終於裝成，又發現天眼原來盲點處處，而警方設置嘅人肉監測站又被踢爆選址有誤，作用成疑。第三宗襲擊案發生後，政府至承認成個監測系統都影唔到個狂徒，更確定唔到犯案地點。使百幾萬公帑得物無所用，簡直係混帳！

最惡頂嘅係，每次發生襲擊案之後，班高官都對住鏡頭誓神劈願話要將狂徒緝拿歸案，仲將懸賞花紅加碼到一共九十萬添，但係促請大廈業主加裝鐵閘咁簡單嘅嘢，都要商戶自己科水搞掂，好似完全同政府無關咁。旨意佢哋破案，蛇都死啦。

政府彩就識攞，嘢就唔做，咁搞法，旺角好快就要改名叫「望角」，行親入去都頭岳岳，商戶個個眼光光；女人街冇晒靚女睇，波鞋街變埋波地咯。叮！