為呢場煞科戰打響頭炮嘅係財爺鬍鬚曾，佢會喺禮拜一朝早出席立法會財經事務委員會，講解香港經濟嘅最新情況。議員除準備插佢紓解民困同振興經濟不力外，仲會繼續追問佢逼走金管局總裁任志剛同欽點特首辦主任陳德霖接任嘅醜聞。

禮拜二係休會前最後一次答問大會，泛民主派肯定質詢煲呔曾點樣回應數萬名喺七．一上街嘅市民訴求，包括好多遊行人士都有嗌嘅「倒曾」口號；到咗禮拜三朝早會召開最後一次立法會大會，打頭陣有政府帳目委員會嘅平機會報告，平機會主席鄧爾邦勢必遭到狠批，仲有大堆議程，保守估計要開兩日。

民政事務委員會將喺禮拜五朝早傾增加賽馬日數，班保守派議員一定會群起發難；下晝嘅財委會處理商務及經濟發展局局長劉吳惠蘭負責嘅「割地賠款式」迪士尼撥款，同埋周一鑊負責嘅「趁火打劫式」三億元衞生抗疫撥款，為咗方便班同事盡情發揮，主席仲特別安排咗兩節合共四粒鐘嘅會議，加時上演呢場「立會煞科插人騷」！

到禮拜六嘅教育事務委員會特別會議，再次討論正生書院同校園禁毒問題，鬧足六日。