早前問過譚志源係咪真有此事，佢扮晒嘢話聽唔到；尋日佢出席一個公開場合，被追問同一問題時，佢雖然唔回應，但就講多幾句，仲講咗「四盡」添！佢話喺政府做咗二十二年以嚟，一直「盡心、盡性、盡意、盡力」，做好自己本分，仲會以謙卑嘅態度服務市民，無論喺任何崗位上，都會本住同一心志同埋態度服務市民喎！

嘩！狂笠自己高帽喎！佢以前做公務員時冇乜特別表現，喺擴大問責制時加入呢隊「八國聯軍」，呢支聯軍過去一年好嘢做唔到，衰嘢就一大籮，就連佢個局擔大旗嘅政制諮詢都要押後。

唯一可以睇到嘅係，若果譚志源可以上位嘅話，佢月薪由依家嘅近二十萬元加多四成，咁除咗佢口中嘅四個盡之外，可以加多一盡就係「加到盡」嘞！