奧運金牌運動員風光背後歷盡辛酸，多年嚟嚴格特訓造成骨骼同肌肉勞損，傷患影響比賽之餘，退役後亦長期承受舊傷患煎熬，中國前體操王子李寧最近就因為舊傷患要入院做手術。
聽聞李寧脊椎骨刺增生，係因為多年嚟喺國家體操隊特訓造成嘅腰脊舊患再次過度勞損，早前喺北京一間醫院做切除手術，現已出院返回北京家中休養，康復進度良好。
醉心中國剪紙藝術嘅王迦南上月發布新書《紙隙尋夢》，佢話原本邀請好朋友李寧做主禮嘉賓，但咁啱李寧因傷患入院做手術未能出席。作為「李寧有限公司」非執董嘅觀塘區議會主席陳振彬，都有慰問老友李寧，佢話專業運動員有舊傷患好常見，好小事啫。