九六年首屆特首選舉開跑時，政界盛傳已故嘅全國政協副主席安子介，力撐政壇徒弟CY參選，但中央最後揀咗另一位人選董建華，而CY又心服口服，滿以為自己從此可以收工，於是佢就拋出「N屆」都唔會參選特首嘅承諾。

但近年煲呔曾政府施政頻失誤，已提早淪為跛腳鴨政府，一直韜光養晦嘅CY開始頻頻出招。人緣麻麻嘅CY首先鎖定要做嘅當然係民望工程，除咗學啲立法會議員開設個人網誌，定期寫文軟銷自己同政績政見之外，又搶先宣布政府嘅工資保障運動成效不彰，力撐最低工資立法，爭取基層支持。

最近佢嘅疑似拉票同造勢活動仲好似大包圍咁，甚至可用「畫公仔畫出腸」嚟形容，包括私下約見各界具影響力人士軟銷，又變身「酒會之星」同「主禮之星」，各類型大小公開活動都畀面出席，甚至上埋電視烹飪節目教煮餸，呢位疑似特首候選人認真搏命。

恭賀疑似對手攞勳章

喺十二年前許下嘅「N屆」唔選承諾，其實佢近年嚟已不斷修正，先係話冇諗過有關問題，之後又話要等啲仔女出晒身，自己冇家庭顧慮先再諗；早排佢又為參選列出四大條件，話要睇吓社會有冇需要、自己有冇能力，同埋有冇天時同地利等。

尋日佢再次公開轉口風，問佢搞咁多嘢係咪為咗選特首，佢一語雙關咁答「遲啲再講」，仲話專登去信恭賀另一名疑似特首參選人獲頒大紫荊勳章，大讚對方係實至名歸。表現得好有氣度咁，唔知係咪嚟一招先禮後兵呢？

睇嚟距離依家仲有兩年幾嘅特首選戰，CY已經提早進入入閘階段，隨時都準備好起步開跑！