未來日子，睇怕仲有排熱！想起港府要立法停車熄匙，當堂熱從心中起！呢啲政策，擾民有餘，難助環保！一旦立例，職業司機無不叫苦連天，燠熱翳焗天時，如果上咗架高溫的士，唔火滾勢係假──除非閣下是涼血動物！寫寫吓都已經火滾，低吟「短布單衣一幅巾，暫來閒處避紅塵，低昂自看水中影，好箇山間林下人」，筆者一樣揮汗如雨，濕透衣衫，認真攞命。

不過，幸好我有消暑妙法──立刻上ontv娛樂台，起碼眼睛可吃冰淇淋！水着模時時有，鈕扣毋須用許多！千祈唔好話我鹹濕，如果個個好似我咁識調整心火，呢個社會肯定和諧穩定，灑向香江都是美，少啲人大熱天時上街表達訴求，政府肯定唔使咁頭痕！

講開ontv娛樂台，常有意外之喜。早前見一模着熱褲拍寫真，效果差強人意，事關熱褲好「蝦人」着──女人穿熱褲，條腿如果冇四十二吋長，咁就好容易犯咗美學上的「單調的暴露」大忌。

着熱褲的那位模，筆者如果是美術指導，必定叫佢着薄紗衣料的羅裙，「春心若肯牢關住，鈕扣毋須用許多」，這一粒鈕該扣還是不扣，便是「領口有多低」的學問。風來時，「移時吹又開」，一代性感女星瑪麗蓮夢露那鼓動的紅裙之所以不朽，憑的就是「春衫剪就穿輕薄」！

青春作伴，有三分姿色七分化妝的女人，雙手掩裙，已可令電車男雙眼釋出高壓電！