回收桶出咗好幾代，連宣傳口號都變咗「新三色，你要識，廢紙、塑膠、金屬都合適」嘞。不過，咪以為愈新款愈環保吖，環保署舊年年底使咗七十五萬元添置一千五百個新款回收桶，點知因為「先天性殘障」，用咗半年已經七勞八傷，焗住靜靜雞用番舊款，好多新桶被迫提早「退役」，公帑掟晒落鹹水海不特止，仲污染埋環境。

環保署以為，新款回收桶用塑膠物料造，可循環使用，唔似舊款咁只能夠用兩年，而且冇得回收，聽落夠晒環保。點知班官員好似永遠都唔會用個腦諗嘢咁，新設計本身就已經係個問題。

呢嗱，新款回收桶最大特點之一就係加咗把鎖，話防止廢物畀人偷喎。正一係無喇喇整撻瘌，係人都知廢料有價，廢紙、鋁罐、膠樽樣樣可以賣錢，新款回收桶質料又脆又薄，一扑就爛，環保署加把鎖唔單止起唔到防盜作用，反而會令執垃圾嘅人夾硬扑爛把鎖，或者撬爛個蓋。

本報記者巡視多區發現，新款回收桶幾乎絕迹，就算見到都係同舊款擺埋一齊，中環一帶竟然清一色全部係舊桶，據講係因為新桶全部畀人整爛晒。

叮！環保署阿茂整餅，冇嗰樣整嗰樣。舊款用得好地地，又夠硬淨，失驚無神使一大筆公帑換新嘅，用咗幾個月爛得七七八八，環保效果達唔到，仲留低一大堆爛桶。請問署長王倩儀，呢啲究竟係推動環保定係破壞環保，係回收廢物定係製造垃圾？

環保署假環保早有前科，前排為咗做騷，未充分諮詢業界就採用國際最嚴格標準，推出規管汽車修補漆料排放揮發性有機化合物嘅新規例。結果新噴漆物料同遮貼噴油用嘅物料，都要由唔能夠循環再用嘅物料取代，畀業界批評「推動不環保工業運作」。

叮！仲有嗰個吹到天花龍鳳嘅電子廢料回收計劃，因為回收箱嚴重不足，專門收電子廢料嘅回收車更只得一架咁大把，環保署舊年喺各區回收舊電腦同手機唔到六萬件，佔全港每年出售相關產品嘅比例唔到百分之五，簡直微不足道。

最搞笑嘅係，三色回收桶愈擺愈多，但係回收物料嘅數量反而逐年下降，以○七年數字為例，比○三年足足少咗接近三成。環保署呢張推廣廢物分類措施嘅成績單，叫納稅人點收貨吖？

叮佢個鎯鎯！應該做嘅嘢冇人做，但係啲官就得閒到抽筋。環保署有個專責處理推行廢物管理政策、月薪十二萬嘅高官喺舊年被踢爆，每日返工超過一半時間喺度睇鹹網，有時仲睇成六粒鐘。高官咁做嘢法，香港環保愈搞愈唔似樣，一啲都唔出奇啦。