前商務及經濟發展局長馬時亨大女馬露明（Christine）創立嘅教學中心JEMS尋日正式開幕，Christine兼任校長同老師，主要透過活動教導小朋友正確嘅德育觀念。Christine媽咪王培琪同細妹馬露玲都有出席支持，唯獨爹哋肥亨缺席。
原來九歲已經想做教師嘅Christine都曾經試過偷懶，佢同記者透露啱啱去英國嘅時候成日唔讀書，結果嗰年成績好差，返到香港雖然無畀父母鬧，但就感覺到佢哋好失望。Christine話見到父母個樣，感覺到佢哋嗰種無形嘅心痛，好似當頭棒喝咁，終於的起心肝發奮讀書。
但喺JEMS上堂都唔平，兩星期嘅暑期班要成四千八蚊；雖然Christine話賺蝕唔係佢最關心，但得到舊學生同朋友嘅宣傳，暑期班都差唔多收爆。