政府又「派餅仔」，日前公布新一批授勳名單，立法會衞生服務界議員李國麟榜上有名，獲頒銀紫荊星章。佢前日拖埋做那打素護理學院院長嘅老婆李子芬出席酒會，講起首次獲頒「荷蘭水蓋」，佢話感覺好開心，證明多年來喺醫護界工作獲得認同，不過得獎還得獎，大事慶祝活動就唔會搞嘞。
被問到有冇打算將「荷蘭水蓋」放喺保管箱內珍藏，佢反問：「你唔知依家申請保管箱好難㗎咩?」佢話提供保管箱服務嘅銀行已買少見少，往往輪候一年半載仍然得個吉，佢至今仲未申請到保管箱，值錢嘅金銀珠寶亦只好放晒喺屋企。
申請唔到都未必係壞事，事關銀行保管箱未必百分百安全，以前就發生過保管箱火警，一把火就燒晒客戶啲珍藏，好多人情願買個夾萬喺屋企鎖住啲嘢。
之不過，將屋企變成「黃金屋」，唔驚惹賊垂涎咩？佢望望身邊嘅老婆話：「全屋最值錢嗰個就係我太太，其他嘢唔緊要囉。」李國麟乘機發表愛的宣言，睇怕佢老婆好受落，但外人聽落去就……認真肉麻！