政務司司長以外訪為名，玩到下個星期一才返港，撞啱教育局局長孫明揚星期一驛馬星動，訪問新加坡，政制及內地事務局局長林瑞麟又離港，造就保安局局長李少光有機會署任政務司司長，過番一日CS癮。
過去經常署任CS嘅孫公，咁啱後日啟程去新加坡訪問三日，同世界各地教育部門首長同業界領袖交流，CS個位又要搵替工。
憲報尋日公布，光哥將於下周一署任政務司司長。按局長年資計，當孫公唔喺度，應該由「林D9」林瑞麟頂上，但係咁啱林D9去咗成都，於是造就光哥「紮職」，過一過特區「冧巴吐」癮。
據聞光哥今次係第二次過CS癮，對上嗰次喺去年七月，當時又係遇啱啲官員齊齊去四川商討災後重建。光哥十年唔發市，難得過番一日CS癮，唔知佢會唔會特別記得呢一日呢？