政府總部不設防，早前「綠色和平」成功避過保安耳目，喺政府總部西座外牆掛上諷刺煲呔曾係「氣候逃犯」嘅巨型「通緝令」。有議員投訴，自從「氣候逃犯」事件之後，政府總部西座突然收緊保安政策，令登門市民不勝其擾。其實，團體抗議，為政者應該虛懷聆聽，但煲呔曾就用落閘方式，阻攔示威者入政府總部範圍；睇嚟佢唔止係氣候逃犯，仲係民意逃犯！
「氣候逃犯」事件發生喺六月二十三日，六日之後立法會議員收到秘書處通知，中區政府合署西座訪客停車場，將會喺七月一日關閉，配合當日遊行活動，而雪廠街入口就會如常開放。但政府言不符實，七一當晚八點左右，有議員辦事處職員攞住政府總部通行證想入西座大樓，遭保安阻止，而大樓裏面嘅人亦半步不能離開。
職工盟李卓人篤爆，最近公眾人士要進入西座大樓困難重重，前往議員辦事處要填埋身份證號碼同電話號碼。阿人已去信要求立法會行管會邀請麥綺明解釋。