八月尾就告別科大嘅朱經武校長，尋日主持任內最後一次大學榮譽院士頒授禮，九巴後人兼羅兵咸永道會計師事務所合夥人雷添良（Tim）、廣東社團總會主席王國強等人分別獲頒殊榮。
原來Tim雷同科大早有淵源，曾任校董會成員多年，做過大學司庫達六年。尋日攞獎，太太、大女Nicola及細仔Anthony齊撐場。Tim雷出身本港四大名牌會計師樓，但家族來頭更勁，祖父係九巴創辦人之一，雷氏家族早年捐出祖屋「雷生春」大宅畀政府，不過Tim雷作風低調，甚少將阿爺威水史掛喺口邊，反而靠自己打江山。
佢憶述話，當年喺英國讀完工商管理後，一心要做會計師，於是考入英國永道會計師樓，一邊打工一邊考取會計師牌。幾經辛苦，Tim雷終成為頂尖會計師樓合夥人之一。
Tim雷近年精心部署繼任人，將安排公子入讀英國大學修讀會計，有子承繼衣鉢；千金就計劃入英國劍橋讀法律，鋪路成專業人士。