潘佩璆置業慳油錢

受金融海嘯打擊，早前樓市大幅下跌，但都唔覺有乜政府高官同行政會議成員申報賣樓套現，似乎已經預示咗今次跌浪冇上次金融風暴咁急。最近樓市持續回升，林公公就第一時間申報多咗一個同家人共同擁有嘅車位，位置同佢間自住物業一樣位於港島南區，但唔知係咪同一個屋苑。呢個新車位係用嚟出租嘅，加上佢喺中西區嘅兩個出租住宅單位，就算一個唔好彩闖咗大禍要問責下台，生計都肯定唔成問題。

本身喺聯合醫院做精神科醫生嘅潘佩璆，最近亦喺九龍區再度置業，用嚟做佢返工用嘅「行宮」。潘醫生解釋，自從做咗立法會議員之後，每日要由依家住緊嘅粉嶺區，揸車往返中環立法會、觀塘聯合醫院、同主要位於九龍區嘅各個工聯會辦事處，真係好辛苦兼嘥油錢，因此決定喺較方便嘅位置買多間樓住，但粉嶺間舊屋亦會繼續保留自用。

根據立法會嘅申報資料，潘醫生喺港島同九龍區亦有物業出租，但唔知到底有幾多間，佢自己就淨係肯講有「幾間」，名副其實係一名「隱形樓王」。

佢又話自己同太太嘅理財哲學都比較傳統，信磚頭多過股票，多年來一有錢剩就會買樓，累積到依家嘅投資回報自然有番咁上下，但係就強調絕對唔係炒樓。佢承認今次入市除咗貪方便之外，亦有多少睇好樓市前景，至於一般市民應唔應該跟佢，就要自己衡量風險同實力喇！