尋日交通諮詢委員會討論打擊酒後駕駛嘅立法建議，同意政府建議加重酒後駕駛刑罰，引入一個「超標愈多、罰得愈重」嘅累進式三級制刑罰。交諮會主席鄭若驊話加重罰則可以令市民明白酒後駕駛嘅嚴重性，不如大家一齊睇吓呢個三級制有幾辣。

第一級係每一百毫升血液內酒精含量達五十至七十九毫克，初犯者至少停牌半年；第二級酒精含量八十至一百四十九毫克，初犯停牌唔少於一年；而第三級，即係最重手嘅一級，就係酒精含量一百五十毫克或以上，初犯最少停牌兩年，再犯者最少停牌五年。

此外，交諮會仲支持引入「危險駕駛引致他人身體嚴重受傷」嘅新例，又舉腳贊成如果血液內酒精含量超過法定限度三倍，應該係加重刑罰嘅因素。

聽落好似幾有阻嚇力咁，之不過，就算法例寫得再嚴又有乜用？司法機構劑劑判刑都好鬆手，用嚟嚇鬼都唔驚。

呢嗱，警方今年二月九日起執行隨機酒精呼氣測試打擊酒後駕駛，但新法例實施之後，咪照樣有大把醉貓司機目無法紀，繼續喺馬路上橫衝直撞。

新例實施之後四個月，已經有四十八人斷正，雖然首次有司機冇發生意外但違反酒後駕駛法例遭判監禁嘅個案，兩人分別被判監兩個月及十四日，不過係緩刑，唔使踎監。其餘好多都係停牌三個月、罰款幾千元就算。

仲有喎，去年七月政府修例，將危險駕駛導致他人死亡嘅最高刑罰由監禁五年加到十年，不過新例生效第二日，有個醉貓司機當佢冇到，喺灣仔亂咁片，結果喺東區走廊撞死咗一個揸電單車嘅男子。

法官審呢單案嘅時候，落重火力狂轟被告行為極度差劣兼具侵略性，自私兼不負責任。咁講法，呢位仁兄睇怕至少要坐十碌八碌啦。點知法官竟然以六年作量刑起點，七除八扣之後，最後判囚四年、停牌五年以及罰款兩千元咁大把。

叮佢個鎯鎯，醉酒駕駛撞死人，其實同謀殺有乜分別吖？只係判四年咁少，可見所謂最高刑罰完全形同虛設，根本起唔到阻嚇作用！

唔單止醉酒駕駛危險，醉酒坐車一樣好易出事。今年二月，尖沙咀就有一個光頭醉酒佬半路中途狂炳的士司機，之後仲搶埋架車舞龍咁舞，一個唔好彩撞上行人路，隨時傷亡慘重。

至於日前發生嗰單就冇咁好彩，懷疑有醉酒佬坐坐吓的士突然搶軚盤，搞到的士喺中環亂咁片，造成一死三傷。

正所謂「酒能亂性」，最弊係呢個政府一方面叫人唔好飲咁多，另一方面又減酒稅。冇辦法啦，鬼叫唔少達官貴人都係愛酒之人咩。不過，唔好話太一叮疑心大，依家咁多酒後駕駛，唔知同減酒稅有冇啲關係呢？

講到底，醉駕絕對係累己累人，計太一叮話齋，呢種人停牌幾年都嫌少，應該一世都唔畀再揸車就啱。若然醉駕撞死人呢，唔使講，梗係先叮爆佢鎯鎯，再掟佢入監坐成世啦！