例如最近備受爭議嘅抽取海水立法，肥仔明批評梁卓偉淨係識得睇住水辦有幾多粒細菌，冇諗到鯉魚門海鮮食肆嘅實際難處；日前政府問立法會撥款搞全城清潔，佢連可以創造幾多就業機會嘅基本資料都冇，似技術官僚多過政治問責官員，令人質疑佢只得一張刀利。

局內嘅政治助理陳智遠，肥仔明話覺得佢似跑腿多啲，點計唔值十幾萬一個月；加上佢三十歲未夠，好多議員收到佢電話，都會質疑「做乜派個口靚仔嚟搵我？」

商務及經濟發展局副局長蘇錦樑喺卡片風波後，作風愈嚟愈官僚。有次喺立法會回應失實豐胸廣告嘅問題，竟然引用不良醫藥廣告條例嚟答，仲畀肥仔明直斥佢「廢話」同「垃圾」。

煲呔曾以為請番嚟嘅「八國聯軍」副局長同政助都身懷絕技，張張刀都利，點知原來全部都係膠刀，點同啲議員砌呀？