立法會放暑假期間會有幾個外訪團，頭炮係由滅貧事宜小組委員會搞嘅台灣南韓七天團，目的係考察當地嘅社會企業政策；第二團係由議會聯絡小組委員會搞嘅東歐三國十二天浪漫遊，目的係考察當地嘅政改經驗同議會運作，團費仲未計到，而委員會主席兼訪問團團長「大舊石」石禮謙就選擇自費。
最後一團就更加當豬流感冇到，由海濱規劃事宜小組委員會建議搞嘅美加九天團，目的係考察當地嘅海濱規劃發展，暫定九月二十五日起行，行程包括紐約、波士頓、巴爾的摩同溫哥華等豬流感重災區，十月三日先返港，暫有六名議員報名，包括起程兩日前先遊完東歐返港嘅大舊石，但呢次佢係用公費報團。
美加團由委員會主席劉秀成做團長，佢同大舊石同屬專業會議，同一個政團派兩個人去考察，係咪實際有需要呢？睇完上述例子，大家都應該同意借用某個啤酒廣告嘅名言，仲要搵葛民輝旁白：如果立法會轉行搞旅行社，可能係世界上最好嘅。