政府要趕住推出香港迪士尼樂園擴建計劃，質咗立法會經濟發展事務委員會主席林健鋒食死貓，要佢召開一個冇議程嘅會議，搞到佢畀同僚狂插，尋日委員會討論樂園擴建，佢竟然冇嬲，反而兩次搶答幫政府答問題。
有議員唔明點解今次擴建令政府手握樂園嘅股份下跌，究竟條數點計？商務及經濟發展局局長Rita劉吳惠蘭都未嚟得切反應，林健鋒已經搶答，仲將條數以清晰易明嘅方法加一次畀大家聽，即時令Rita口啞啞。
跟住有議員批評以動畫《反斗奇兵》嘅主題園區，話呢齣動畫已有十年歷史，加埋擴建工程嘅五年，咪變相落伍咗十五年囉？林健鋒又幫口話有時啲嘢係愈老愈可愛，《變形金剛》已有三十年歷史，套電影都係依家先上畫，仲係今年最賣座嘅電影添！睇佢嘅表現，係咪當咗自己係局長呀？